استباحت

استباحت سراير مهجتى أمسيه..كنت نورن أحس بضيق عتماتها
ماثلن فى طريقن وجهته مقفيه..تنتحر فيه آمالى بخيباتها
كم بعيده هكالضلعان والاوديه..والمنازل وكبدن من فلذاتها
وردة(ن)أشعر انى حب مستنديه..يتنفس شذاها كل من فاتها
وانا حارس على نقطة شقا مضنيه..تعبر الناس حزنى بابتساماتها
مالقيت فمكانى ذاك من تسليه..غير بيض(ن) اتقدم لى هوياتها
علهن يبسمن بنظرة(ن)مغريه..علهن يمنحن الروح رغباتها
يعبرنى يغيبن كنهن أضويه..تبتعد ثم تطفيها نهاياتها
والشتا يطرق الساحات والابنيه..كان للريح وجد(ن) فى عتاباتها
له على خاطرى من وحيها أغنيه..بت وحدى أغنيها بآهاتها
أحتضن بندقى واهيم فى أمنيه..وين ماهم طرفى خال نجماتها
جاوزت بى حدود الحلم مستعصيه..لين ذبت فخيال(ن) من خيالاتها
عشتها سكرة(ن) فى ليلة(ن)مضويه..ماحياها ولد عز(ن) ولاماتها
ولاهواها ذليل(ن) شيمته مخزيه..أو عيون الجبان أمست بغفواتها
كفوها من يشوف الدم والتضحيه..حب الاوطان لاهانت كراماتها
أحرس وأحلم وأحرس بلا أغطيه..والجنود ابعدوا عنى بدفواتها
رقدوا فى وجيه(ن) كنها أحذيه..كم مشت فى دروب الذل خطواتها
وش لى أحيا حياة(ن) أدهرت مزريه..تخنق الحالم النشوان نسماتها
صار طعم الحزن والخبز والادويه..واحد(ن)تمزجه نفسى بعبراتها
أدرك ان البشر أمراضها معديه..واستمد الدوا منها بعلاتها
كان جتك النفوس المانعه معطيه..ماتجود العفون الا بفضلاتها
ابتسم للزمان بداعى السخريه..كل ماشالت الاصنام عرضاتها
شاهد المجد كوره والصروح أنديه..همة(ن) ماتطول العز راياتها
عيش عنها شريد(ن) والعمر تمضيه..والوطن أى أرض(ن) تستر أمواتها